منفرد نمازی کا امام کی آیت سجدہ سننا

اگر منفرد آدمی کسی دوسرے امام کی قرات میں سجدہ تلاوت سن لے، اس کا کیا حکم ہے؟

اَلجَوَابْ بِاسْمِ مُلْہِمِ الصَّوَابْ

اگر كوئی شخص امام کے ساتھ نماز میں شامل نہ ہو اور آیتِ سجدہ سن لے تو ایسے آدمی پر بھی سجدہ کرنا لازم ہو جاتا ہے، البتہ اگر امام کے ساتھ سجدے میں شامل ہو جائے یا امام کے سجدہ کرنے کے بعد، اسی رکعت میں امام کے ساتھ شامل ہو جائے تو یہ سجدہ اس کے ذمے سے ساقط ہو جائے گا، ورنہ نماز کے بعد الگ سے سجدہ تلاوت کرنا لازم ہوگا۔

حوالہ جات

*الفتاوى الهندية:(1/ 133،ط:دارالفکر)*
"و لو سمعها من الإمام أجنبي ليس معهم في الصلاة ولم يدخل معهم في الصلاة لزمه السجود، كذا في الجوهرة النيرة، وهو الصحيح، كذا في الهداية. سمع من إمام فدخل معه قبل أن یسجد، سجد معه، وإن دخل في صلاة الإمام بعد ماسجدها الإمام لایسجدها، وهذا إذا أدرکه في آخر تلك الرکعة، أما لو أدرکه في الرکعة الأخری یسجدها بعد الفراغ، کذا في الکافي، وهکذا في النهایة.

*البحرالرائق:(131/2،ط:دارالکتاب الاسلامی)*
قوله: ولو سمعها المصلي من غيره سجد بعد الصلاة.