دکان دلانے کا وعدہ کر کے وعدہ پورا نہ کرنا

السؤال

خالد نے 2005ء میں ایک دکان خریدی اور اس میں مال ڈال کر زید کے حوالے کر دی کہ وہ اس میں کام کرے۔ دونوں کے درمیان یہ معاملہ طے پایا کہ دکان سے حاصل ہونے والا نفع دونوں میں آدھا آدھا تقسیم ہوگا اور جب دکان خالی کریں گے (یعنی شراکت ختم کریں گے) تو دکان میں موجود مال بھی برابر (آدھا آدھا) تقسیم کر لیں گے۔ یہ معاملہ 2014ء تک خوش اسلوبی سے چلتا رہا۔ 2014ء میں زید کو اسی دکان کے قریب ایک اور دکان ٹھیکے (کرائے) پر مل رہی تھی۔ جب خالد کو اس بات کا علم ہوا تو اس نے زید کو وہ دکان لینے سے روکا اور کہا کہ: "میں اس دکان کے برابر والی دکان خرید رہا ہوں، جو تمہارے لیے ہے۔" اس یقین دہانی کی وجہ سے زید نے وہ ٹھیکے والی دکان نہیں لی۔ اس کے بعد 2014ء سے 2020ء تک ان کا پرانا معاملہ چلتا رہا۔ 2020ء میں دونوں کے درمیان شدید اختلافات پیدا ہوگئے۔ ان اختلافات کی بنیاد پر انہوں نے اپنی شراکت ختم کر دی اور سابقہ طے شدہ شرائط کے مطابق نفع اور دکان کا مال آپس میں آدھا آدھا تقسیم کر لیا۔ زید اپنا مال اور حصہ لے کر کسی دوسری جگہ چلا گیا اور وہاں جا کر دکان کھول لی۔ بدقسمتی سے زید کا اس نئی جگہ پر کام نہیں چلا تو وہ کچھ عرصے بعد واپس آ کر خالد سے یہ مطالبہ کرنے لگا کہ: "2014ء میں تم نے مجھے دکان لینے سے روکا تھا اور کہا تھا کہ برابر والی دکان میرے لیے لے رہے ہو، اس لیے وہ دکان مجھے دی جائے۔" (یہاں یہ بات واضح رہے کہ خالد نے 2014ء کے بعد وہ برابر والی دکان اپنے ذاتی پیسوں سے خریدی تھی۔ (1) دریافت طلب امر یہ ہے کہ کیا شریعت کی رو سے زید کا 2014ء کے زبانی وعدے کو بنیاد بنا کر اس دکان کا مطالبہ کرنا درست ہے؟ (2) خالد، جس نے وہ دکان اپنے ذاتی پیسوں سے خریدی ہے، کیا اس پر شرعاً یا قانوناً یہ لازم ہے کہ وہ دکان زید کے حوالے کرے؟